José R. Morala, Roberto González-Quevedo y Nicolás Bartolomé (2021). La lengua leonesa: literatura y textos. Cátedra de Estudios Leoneses-Universidad de león (254pp)

Abstract

Nel prólogo qu’inicia esta obra, José Ramón Morala asegura que la so publicación respuende al facto de que l’atención sobre l’asturllionés de Llión “se ha dirigido tradicionalmente a la vertiente oral de la lengua, dejando en un segundo plano los textos escritos” (p. 6). Nun dexa de resultar chocante una afirmación tal, que namás puede entendese ante l’afaradora presencia simbólica d’El dialecto leonés na llionesística contemporánea, pues supón escaecer que, primero que Ramón Menéndez Pidal, tuvo Emil Gessner inaugurando toa una tradición lingüística d’aproximación al llionés como una llingua muerta, onde namás se tenía en cuenta pal estudio la lletra escrita, fuera medieval o proveniente de la obra de Cayetano Álvarez Bardón. Hai que recordar qu’esta tradición, pese a los avances de les últimes décades, sigue teniendo pesu, especialmente en terrenos como la toponimia mayor, onde bien pocos investigadores acuden tovía a les formes populares orales frente a les referencies descomanaes a la documentación.